بەرزکردنەوەی ئەلیاس بۆ ئاسمان
١ کاتێک یەزدان ویستی ئەلیاس لە گەردەلوولێکدا بۆ ئاسمان بەرز بکاتەوە،
ئەلیاس و ئەلیشەع لە گلگالەوە بەڕێکەوتن.
٢ ئەلیاس بە ئەلیشەعی گوت:
«لێرە بمێنەرەوە،
چونکە یەزدان منی ناردووەتە بێت‌ئێل.»
ئەلیشەعیش گوتی:
«بە یەزدانی زیندوو و بە گیانی خۆت،
بەجێت ناهێڵم.»
ئینجا بەرەو بێت‌ئێل چوون.
٣ ئەندامانی کۆمەڵی پێغەمبەرانی بێت‌ئێل هاتنە دەرەوە بۆ لای ئەلیشەع و لێیان پرسی:
«دەزانیت ئەمڕۆ یەزدان گەورەکەت لە تۆ دەستێنێ؟»
ئەویش گوتی:
«بەڵێ دەزانم،
بێدەنگ بن.»
٤ ئینجا ئەلیاس پێی گوت:
«ئەلیشەع،
لێرە بمێنەرەوە،
چونکە یەزدان منی ناردووەتە ئەریحا.»
ئەویش گوتی:
«بە یەزدانی زیندوو و بە گیانی تۆ،
بەجێت ناهێڵم.»
ئینجا چوونە ئەریحا.
٥ ئەندامانی کۆمەڵی پێغەمبەرانی ئەریحاش لە ئەلیشەع هاتنە پێشەوە و لێیان پرسی:
«دەزانیت ئەمڕۆ یەزدان گەورەکەت لێ دەستێنێت؟»
ئەویش گوتی:
«بەڵێ دەزانم،
بێدەنگ بن.»
٦ پاشان ئەلیاس پێی گوت:
«لێرە بمێنەرەوە،
چونکە یەزدان منی ناردووەتە ڕووباری ئوردون.»
ئەویش گوتی:
«بە یەزدانی زیندوو و بە گیانی تۆ،
بەجێت ناهێڵم.»
ئینجا هەردووکیان ڕۆیشتن.
٧ پەنجا ئەندامی کۆمەڵی پێغەمبەران ڕۆیشتن و لە دوورەوە لە بەرامبەر ئەلیاس و ئەلیشەع ڕاوەستان،
ئەوانیش هەردووکیان لەسەر ڕووباری ئوردون ڕاوەستان.
٨ ئەلیاس کەواکەی گرت و پێچایەوە و بە کەوایەکە کێشای بە ئاوەکەدا.
جا ئاوەکە شەق بوو،
هەردووکیان بە وشکانیدا پەڕینەوە.
٩ کاتێک پەڕینەوە،
ئەلیاس بە ئەلیشەعی گوت:
«داوای چی دەکەیت هەتا بۆت بکەم،
بەر لەوەی لێت جیا ببمەوە؟»
ئەلیشەع وەڵامی دایەوە:
«با دوو ئەوەندەی ڕۆحی تۆ بە میرات وەربگرم.»
١٠ ئەلیاس گوتی:
«داوای شتێکی گرانت کرد.
ئەگەر منت بینی کاتێک لێت جیا دەبمەوە،
ئەوا بۆ تۆ دەبێت،
ئەگەر نا بۆت نابێت.»
١١ ئەوە بوو کاتێک دەڕۆیشتن و قسەیان دەکرد،
لەناکاو گالیسکەیەکی ئاگرین و چەند ئەسپێکی ئاگرین هەردووکیانی لێک جیا کردەوە،
ئەلیاس لە گەردەلوولێکدا بۆ ئاسمان سەرکەوت.
١٢ ئەلیشەع ئەمەی بینی و هاواری کرد:
«باوکە!
باوکە!
گالیسکەکەی ئیسرائیل و سوارەکانی!»
ئیتر ئەلیشەع ئەلیاسی نەبینییەوە.
ئینجا جلەکەی بەر خۆی دادڕی و کردی بە دوو پارچەوە.
١٣ کەواکەی ئەلیاسی هەڵگرتەوە کە لێی کەوتبووە خوارەوە،
گەڕایەوە و لەسەر کەناری ڕووباری ئوردون ڕاوەستا.
١٤ ئینجا کەواکەی ئەلیاسی هەڵگرت،
ئەوەی لێی کەوتبووە خوارەوە،
بە کەوایەکە کێشای بە ئاوەکەدا و گوتی:
«یەزدانی پەروەردگاری ئەلیاس لەکوێیە؟»
کاتێک بە ئاوەکەیدا کێشا،
ئاوەکە شەق بوو و ئەلیشەع پەڕییەوە.
١٥ کاتێک ئەندامانی کۆمەڵی پێغەمبەرانی ئەریحا،
ئەوانەی لە بەرامبەری بوون بینییان،
گوتیان:
«ڕۆحی ئەلیاس لەسەر ئەلیشەع جێگیر بووە.»
ئینجا بەرەوپیری چوون و کڕنۆشیان بۆ برد.
١٦ پێیان گوت:
«ئەوەتا خزمەتکارەکانت پەنجا پیاوی تواناداریان هەیە.
لێیانگەڕێ با بچن بەدوای گەورەکەتدا بگەڕێن.
لەوانەیە ڕۆحی یەزدان هەڵیگرتبێت و لەسەر کێوێک یاخود لەناو یەکێک لە دۆڵەکان داینابێت.»
ئەلیشەع گوتی:
«مەیاننێرن.»
١٧ بەڵام زۆریان لێکرد هەتا شەرم دایگرت و گوتی:
«بیاننێرن.»
ئەوانیش پەنجا پیاویان نارد،
سێ ڕۆژ بەدوایدا گەڕان و نەیاندۆزییەوە.
١٨ کاتێک گەڕانەوە لای ئەلیشەع کە هێشتا لە ئەریحا مابووەوە،
پێی گوتن:
«پێم نەگوتن مەچن؟»
سازگارکردنی ئاو
١٩ پیاوانی شارەکە بە ئەلیشەعیان گوت:
«ئەوەتا هەروەک گەورەم دەبینێت شوێنی شارەکە باشە،
بەڵام ئاوەکە خراپە و خاکەکەشی بێ پیتە.»
٢٠ ئەویش گوتی:
«قاپێکی نوێم بۆ بهێنن و خوێی تێ بکەن.»
ئەوانیش بۆیان هێنا.
٢١ ئینجا چووە دەرەوە بۆ سەرچاوەی ئاوەکە و خوێیەکەی فڕێدا ناوی و گوتی:
«یەزدان دەفەرموێت:
”ئەم ئاوەم سازگار کرد و جارێکی دیکە نابێتە هۆکاری مردن و بێ بەروبوومی خاک.“»
٢٢ بەگوێرەی ئەو قسەیەیە کە ئەلیشەع کردی هەتا ئەمڕۆش ئاوەکە سازگارە.
گاڵتەکردن بە ئەلیشەع
٢٣ ئینجا ئەلیشەع لەوێوە چوو بۆ بێت‌ئێل،
کاتێک بە ڕێگاکەدا سەردەکەوت،
کۆمەڵێک مێردمنداڵ لە شارەکەوە هاتنە دەرەوە و گاڵتەیان پێکرد،
پێیان گوت:
«کەچەڵ لێرە بڕۆ!
کەچەڵ لێرە بڕۆ!»
٢٤ ئەویش ئاوڕی لەدوای خۆی دایەوە و تەماشای کردن،
بە ناوی یەزدانەوە نەفرەتی لێکردن.
ئیتر دوو ورچ لە دارستانەکە هاتنە دەرەوە و چل و دوو کوڕیان پارچەپارچە کرد.
٢٥ ئەلیشەع لەوێوە چوو بۆ کێوی کارمەل،
ئینجا لەوێشەوە گەڕایەوە سامیرە.