مزگێنی بەپێی نووسینی لۆقا
کورتە باسێک
لۆقا پزیشک و مێژوونووسێکی یۆنانی بووە، ئەو تەنها کەسێکە کە جولەکە نەبووە و مژدەی مەسیحی نووسیوەتەوە، هاوڕێی نزیک و یاوەری پۆڵس بووە. لە دەوروبەری ساڵی (٦٠ ز.) لە قەیسەرییە یان لە ڕۆما بە سروشی (وەحی) ڕۆحی پیرۆز پەیامی مژدەی شانشینی خودا و سەربوردەی ژیان و پەرجووەکانی (موعجیزە) مەسیحی نووسیوە، هەروەها نووسەری پەڕتووکی کرداری نێردراوانە کە تەواوکەری ئەم پەڕتووکەیە. لۆقا بەهۆی ئەوەی ڕۆشنبیر بووە زۆر گشتگیرانە و بە زمان پاراوی نووسیویەتی و پایەیەکی تایبەتی داوەتە ئافرەت.
لۆقا بۆ ساوفیلۆس (خۆشەویستی خودا) و هەموو خەڵکێک دەنووسێت، بە تایبەتی ئەوانەی جولەکە نین، هەروەک خۆی لە سەرەتای پەڕتووکەکەیدا باسی دەکات کە بەدوای سەرچاوەی ڕاستدا گەڕاوە بۆ زانیارییەکانی سەبارەت بە ژیانی عیسا لەسەر زەوی. مەسیح لەم پەڕتووکەدا مرۆڤێکی تەواو و دڵسۆزە، ڕزگارکەری هەموو جیهانە، هەروەک فەرموودەی عیسا دەنووسێت: «ئەمڕۆ ڕزگاری بۆ ئەم ماڵە هات، لەبەر ئەوەی ئەویش کوڕی ئیبراهیمە، چونکە کوڕی مرۆڤ هاتووە بەدوای لەناوچواندا بگەڕێت و ڕزگاریان بکات.» ١٩‏:٩‏-١٠.‏‏
لۆقا چڕدەبێتەوە لەسەر پەیوەندییەکانی عیسا لەگەڵ خەڵک و هەروەها ئەو نەخۆش و نەخۆشییانەی کە چاکی دەکردنەوە، بە ڕوونی باسی لێوەکردوون.