هاتنی یەترۆ بۆ لای موسا
١ یەترۆی خەزووری موسا کە کاهینی میدیان بوو،
هەموو ئەو شتانەی بیستەوە کە خودا لەگەڵ موسا و ئیسرائیلی گەلەکەی کردبووی،
کە یەزدان ئیسرائیلی لە میسرەوە دەرهێناوە.
٢ لەدوای ئەوەی موسا چیپۆرەی ژنی ناردبووەوە یەترۆی خەزووری هێنایەوە،
٣ لەگەڵ هەردوو کوڕەکەی.
ناوی یەکێکیان گێرشۆمە،
چونکە موسا گوتی:
«نامۆ بووم لە خاکی بێگانە.»
٤ ناوی ئەوەی دیکەشیان ئەلیعەزەر بوو،
چونکە گوتی:
«خودای باوکم یارمەتیدەرم بوو و فریام کەوت لە شمشێری فیرعەون.»
٥ یەترۆی خەزووری موسا و کوڕەکانی و ژنەکەی هاتنە لای موسا بۆ ئەو چۆڵەوانییەی ئەو لەوێ لەلای کێوی خودا لایدابوو.
٦ یەترۆ هەواڵی بۆ موسا نارد:
«من یەترۆم،
لەگەڵ ژنەکەت و دوو کوڕەکەی* بۆ لای تۆ هاتووم.»
٧ موساش هاتە دەرەوە بۆ پێشوازی خەزووری،
کڕنۆشی برد و ماچی کرد،
لە هەواڵی یەکتریان پرسی و چوونە ناو چادرەکە.
٨ موساش هەموو ئەو شتانەی بۆ خەزووری گێڕایەوە کە یەزدان بە فیرعەون و میسرییەکانی کرد لە پێناوی گەلی ئیسرائیل و هەموو ئەو ناخۆشییانەی لە ڕێگا تووشیان هات و یەزدان فریایان کەوت.
٩ یەترۆش دڵخۆش بوو بەو هەموو چاکەیەی کە یەزدان لەگەڵ نەوەی ئیسرائیل کردی،
کە فریایان کەوتبوو لە دەستی میسرییەکان.
١٠ یەترۆ گوتی:
«ستایش بۆ یەزدان ئەوەی لە دەستی میسرییەکان و لە دەستی فیرعەون فریاتان کەوت،
ئەوەی فریای گەل کەوت لەژێر دەستی میسرییەکان.
١١ کاتێک بەو شتانە لووتبەرز بوون لەسەر ئیسرائیلییەکان،
ئێستا زانیم کە یەزدان لە هەموو خوداوەندەکان مەزنترە.»
١٢ جا یەترۆی خەزووری موسا قوربانی سووتاندن و چەند قوربانییەکی دیکەی بۆ خودا هێنا،
هارون و هەموو پیرانی ئیسرائیلیش هاتن بۆ ئەوەی لەگەڵ خەزووری موسا بە ئامادەبوونی خودا نان بخۆن.
١٣ ئەوە بوو بەیانی موسا دانیشت بۆ ئەوەی دادوەری بۆ گەل بکات،
ئیتر گەل لە بەیانییەوە هەتا ئێوارە لەلای موسا ڕاوەستان.
١٤ کاتێک خەزووری موسا هەموو ئەو شتانەی بینی کە موسا بۆ گەل دەیکات،
لێی پرسی:
«ئەم شتە چییە تۆ بۆ گەل دەکەیت؟
لەبەرچی بە تەنها دانیشتوویت و لە بەیانییەوە هەتا ئێوارە هەموو گەل لەلات ڕاوەستاون؟»
١٥ موساش وەڵامی خەزووری دایەوە:
«لەبەر ئەوەی گەل دێنە لام هەتا خواستی خودا بزانن.
١٦ هەروەها کاتێک کێشەیەکیان هەبێت دێنە لام،
منیش دادوەری نێوان پیاو و برادەرەکەی دەکەم و فەرز و فێرکردنی خودایان پێ دەناسێنم.»
١٧ خەزووری موساش پێی گوت:
«ئەوەی تۆ دەیکەیت باش نییە.
١٨ خۆت و ئەم گەلەش ماندوو دەکەیت کە لەگەڵتن،
چونکە کارەکە لە تۆ مەزنترە،
ناتوانیت بە تەنها بیکەیت.
١٩ ئێستاش گوێم لێ بگرە و ئامۆژگاریت دەکەم،
با خودات لەگەڵ بێت،
تۆ نوێنەری گەل بە لە بەرامبەر خودا و داواکارییەکانیان پێشکەش بە خودا بکە.
٢٠ فێری فەرز و فێرکردنیان بکە و ئەو ڕێگایەیان پێ بناسێنە کە دەبێت بیگرنەبەر و ئەو ئەرکانەی کە دەبێت بیانکەن.
٢١ بەڵام لەناو هەموو گەلدا پیاوی بە توانا و لەخواترس هەڵدەبژێریت،
پیاوانی دڵسۆز کە ڕقیان لە دەستکەوتی ناڕەوایە،
دەیانکەیتە کاربەدەست بەسەر هەزاران و سەدان و پەنجایان و دەیان.
٢٢ هەموو کاتێک دادوەری بۆ گەل دەکەن و هەر داوایەکی گەورە هەبێت دەیهێننە لای تۆ،
هەر داوایەکیش بچووک بێت خۆیان بڕیاری لەسەر دەدەن.
ئەوە بارت سووک دەکات،
چونکە ئەوان لەگەڵت هەڵدەگرن.
٢٣ ئەگەر ئەم کارەت کرد و خوداش فەرمانی پێ کردیت،
ئەوا دەتوانیت خۆت ڕابگریت و هەروەها هەموو ئەم گەلەش بە ڕەزامەندی دەگەنە شوێنی خۆیان.»
٢٤ موساش گوێی لە قسەکانی خەزووری گرت و هەموو ئەو شتانەشی کرد کە گوتی.
٢٥ موسا پیاوی بە توانای لە هەموو ئیسرائیل هەڵبژارد و کردنی بە ڕابەر بۆ گەل،
کاربەدەست بەسەر هەزاران و سەدان و پەنجایان و دەیان.
٢٦ ئیتر هەموو کاتێک دادوەریان بۆ گەل دەکرد و داوای گرانیشیان دەهێنایە لای موسا.
بەڵام هەموو داوایەکی بچووک خۆیان دادوەریان تێدا دەکرد.
٢٧ ئینجا موسا خەزووری بەڕێکرد و یەترۆش گەڕایەوە خاکی خۆی.