پۆڵس لە مەکدۆنیا و یۆنان
١ دوای نەمانی ئاژاوەکە،
پۆڵس قوتابییەکانی بانگکرد و ورەی بەرزکردنەوە،
ماڵئاوایی لێکردن و بەرەو مەکدۆنیا بەڕێکەوت.
٢ کاتێک بەو ناوچانەدا تێپەڕی،
بە زۆر وشە ورەی باوەڕدارانی بەرز کردەوە.
لە کۆتاییدا گەیشتە یۆنان
٣ و سێ مانگی لەوێ بەسەربرد.
کاتێک بەتەمابوو بە دەریادا بچێتە سوریا،
جولەکە پیلانیان بۆی گێڕا،
بۆیە بڕیاری دا بە مەکدۆنیادا بگەڕێتەوە.
٤ ئەم کەسانەی لەگەڵ بوو:
لە بیریە سوپاترۆسی کوڕی پیڕۆس،
لە سالۆنیکییان ئەریستارخۆس و سەکوندۆس،
گایۆس لە دەربە و تیمۆساوس،
لە ئاسیاش تیخیکۆس و تروفیمۆس.
٥ ئەمانە پێشمان کەوتن و لە ترۆئاس چاوەڕێیان دەکردین.
٦ بەڵام ئێمە دوای جەژنی فەتیرە،
سواری کەشتی بووین و فیلیپیمان بەجێهێشت،
پاش گەشتی پێنج ڕۆژ گەیشتینە بەندەری ترۆئاس،
لەوێ بەوانەی دیکە شاد بووینەوە و حەوت ڕۆژ لەوێ ماینەوە.
پۆڵس لە ترۆئاس
٧ لە یەکەم ڕۆژی هەفتەدا بۆ نانلەتکردن کۆبووینەوە.
پۆڵس گفتوگۆی لەگەڵ خەڵک دەکرد،
چونکە بەتەمابوو ڕۆژی دواتر بڕوات،
بۆیە هەتا نیوە شەو قسەی بۆ کردن.
٨ ئەو ژوورەی سەرەوە کە لێی کۆببووینەوە چرای زۆری لێبوو.
٩ گەنجێک ناوی یوتیخۆس بوو لەناو پەنجەرەدا دانیشتبوو،
خەوەکوتکێیەکی قورس دەیبردەوە،
پۆڵس وتارێکی درێژی دەدا،
جا خەوی لێ کەوت و لە نهۆمی سێیەمەوە کەوتە خوارەوە،
بە مردوویی هەڵگیرایەوە.
١٠ پۆڵس هاتە خوارەوە خۆی بەسەریدا دا و لە باوەشی گرت و گوتی:
«مەشێوێن،
ژیانی تێدایە!»
١١ دوایی پۆڵس چووە سەرەوە،
نانی لەتکرد و خواردی،
هەتا بەرەبەیان قسەی کرد،
پاشان لەوێ ڕۆیشت.
١٢ گەنجەکەشیان بە زیندووێتی برد و زۆر دڵنەوایی کران.
لە تروئاسەوە بۆ میلیتۆس
١٣ پۆڵس بە ڕێگای وشکانی چوو بۆ ئەسۆس،
ئێمەش بە سواری کەشتی بەرەو ئەوێ بەڕێکەوتین،
چونکە بڕیاری دابوو کە لەوێ چاومان پێی بکەوێت.
١٤ کاتێک لە ئەسۆس تووشمان بوو،
هەڵمانگرت و هاتینە میتیلینی.
١٥ لەوێش بە دەریادا ڕۆیشتین و بۆ بەیانی گەیشتینە بەرامبەر خیۆس،
بۆ ڕۆژی دواتر گەیشتینە سامۆس،
ڕۆژی دوای ئەوەش هاتینە میلیتۆس.
١٦ جا پۆڵس بڕیاری دابوو کە ئەفەسۆس بەجێبهێڵێت نەوەک ماوەیەک لە ئاسیادا بمێنێتەوە،
چونکە پەلەی دەکرد،
بەڵکو بتوانێت لە ڕۆژی پەنجایەمین بگاتە ئۆرشەلیم.
وتەی پۆڵس بۆ پیرانی ئەفەسۆس
١٧ پۆڵس لە میلیتۆسەوە ناردی بۆ ئەفەسۆس،
بانگی پیرانی کڵێسای کرد.
١٨ کاتێک هاتنە لای،
پێی گوتن:
«ئێوە دەزانن لە یەکەم ڕۆژەوە کە پێم خستە ناو ئاسیا،
بە درێژایی ئەو کاتەی کە لەگەڵتان بووم،
چۆن ژیام.
١٩ لە کاتێکدا کە بە پیلانی جولەکە بەرهەڵستکارەکان تووشی تاقیکردنەوەی سەخت بووم،
بەوپەڕی بێفیزی و فرمێسکەوە خزمەتی عیسای خاوەن شکۆم دەکرد.
٢٠ هیچم لەو شتانە دوانەخستووە کە سوودبەخشن و بۆم ڕاگەیاندوون،
بە ئاشکرا و ماڵەوماڵ فێرم کردوون.
٢١ شایەتی ئەوەم داوە لای جولەکە و یۆنانییەکان کە دەبێت تۆبە بکەن و بۆ لای خودا بگەڕێنەوە و باوەڕ بە عیسای خاوەن شکۆمان بهێنن.
٢٢ «ئەوەتا ئێستا وا بە ڕۆحی پیرۆز بەستراوم،
دەچمە ئۆرشەلیم و نازانم چیم بەسەردێت.
٢٣ تەنها ڕۆحی پیرۆز لە هەموو شارێک شایەتیم بۆ دەدات کە گرتن و ناخۆشی چاوەڕێم دەکات.
٢٤ بەڵام هیچ بەهایەکم بۆ ژیانی خۆم دانەناوە،
تەنها ئامانجم ئەوەیە،
ئەو پێشبرکێیە تەواو بکەم و ئەو ئەرکە بەجێبگەیەنم کە عیسای خاوەن شکۆ بە منی سپارد،
ئەویش ئەرکی شایەتیدانە بۆ مزگێنیی نیعمەتی خودا.
٢٥ «ئێستا دەزانم هیچکام لە ئێوە ئیتر ڕووم نابیننەوە کە بە ناوتاندا دەگەڕام و پاشایەتی خودام ڕادەگەیاند.
٢٦ هەر بۆیە ئەمڕۆ شایەتیتان بۆ دەدەم،
کە لە خوێنی هەمووان بێتاوانم،
٢٧ چونکە لە ڕاگەیاندنی تەواوی خواستی خودا بۆتان دوانەکەوتم.
٢٨ ئاگاتان لە خۆتان و لە هەموو مێگەلەکە بێت،
کە ڕۆحی پیرۆز ئێوەی کردووە بە چاودێر بەسەریانەوە.
شوانایەتی کڵێسای خودا بکەن،
کە بە خوێنی خۆی* کڕیویەتی.
٢٩ دەزانم پاش ڕۆیشتنم گورگی ڕفێنەر دێنە ناوتان،
بەزەییان بە مێگەلەکە نایەتەوە.
٣٠ هەروەها لەنێو خۆتاندا خەڵکانێک پەیدا دەبن کە ڕاستیی دەشێوێنن،
تاکو قوتابییەکان بەلای خۆیاندا ڕابکێشن.
٣١ بۆیە ئێشک بگرن،
لە بیرتان بێت بۆ ماوەی سێ ساڵ شەو و ڕۆژ بە فرمێسکەوە نەوەستاوم لە ئاگادارکردنەوەی هەر یەکێکتان.
٣٢ «ئێستاش بە خودا و وشەی نیعمەتەکەیتان دەسپێرم،
کە توانای هەیە بنیادتان بنێت و لەگەڵ هەموو ئەوانەی پیرۆزکراون میراتتان پێ ببەخشێت.
٣٣ چاوم لە زێڕ و زیو و جلی کەس نەبوو.
٣٤ خۆتان دەزانن پێویستی خۆم و یاوەرانم،
ئەم دەستانە دابینیان کردووە.
٣٥ هەموو شتێکم پیشانتاندا کە پێویستە چۆن ڕەنج بدەن بۆ یارمەتیدانی لاوازان،
وشەکانی عیسای خاوەن شکۆتان لەیاد بێت کە خۆی فەرمووی:
”بەخشین لە وەرگرتن بەختەوەریترە.“»