عیسا دوازدە نێردراوەکە دەنێرێ
١ کاتێک عیسا دوازدە قوتابییەکەی بانگکرد،
هێز و دەسەڵاتی پێدان بۆ دەرکردنی هەموو ڕۆحە پیسەکان و چاککردنەوەی نەخۆشییەکان،
٢ ناردنی تاکو مزگێنی پاشایەتی خودا بدەن و نەخۆش چاک بکەنەوە.
٣ پێی فەرموون:
«بۆ ڕێگا هیچ هەڵمەگرن،
نە گۆچان و نە توورەکە،
نە نان و نە پارە،
کەسیش کراسی زیادەی پێ نەبێت.
٤ چوونە هەر ماڵێک لەوێ بمێننەوە هەتا ئەو کاتەی ئەوێ بەجێدەهێڵن.
٥ ئەگەر خەڵکەکەی پێشوازییان لێ نەکردن،
لە شارۆچکەکەیان بڕۆنە دەرەوە و تۆزی پێتان بتەکێنن،
بۆ شایەتی لەسەریان.»
٦ جا بەڕێکەوتن و بە گوندەکاندا دەگەڕان،
مزگێنییان دەدا و لە هەموو لایەک خەڵکیان چاک دەکردەوە.
هێرۆدس یەحیا دەکوژێت
٧ هێرۆدسی ئەنتیپاس کە فەرمانڕەوای جەلیل بوو،
هەموو ئەو شتانەی بیستەوە کە ڕوویدەدا و سەری سوڕما،
چونکە هەندێک دەیانگوت:
«یەحیا لەناو مردووان هەستاوەتەوە.»
٨ هەندێکی دیکەش دەیانگوت:
«ئەلیاس دەرکەوتووە.»
کەسانی دیکەش:
«یەکێک لە پێغەمبەرانی کۆن زیندووبووەتەوە.»
٩ هێرۆدسیش گوتی:
«خۆم سەری یەحیام لێکردەوە،
ئەی ئەمە کێیە شتی وای لێ دەبیستم؟»
لەبەر ئەوە هەوڵی دەدا بیبینێت.
تێرکردنی پێنج هەزار کەس
١٠ نێردراوان گەڕانەوە و ئەوەی کردبوویان بۆ عیسایان گێڕایەوە،
ئەویش ئەوانی برد و بە تەنها چوون بۆ شارۆچکەیەک کە ناوی بێت‌سەیدا بوو.
١١ بەڵام خەڵکەکە زانییان و دوای کەوتن،
ئەویش پێشوازی لێکردن و باسی پاشایەتی خودای بۆ کردن،
ئەوانەی پێویستییان بە چاکبوونەوە بوو چاکیکردنەوە.
١٢ کاتێک ڕۆژ بەرەو ئاوابوون دەچوو،
دوازدە قوتابییەکە هاتن و پێیان گوت:
«خەڵکەکە بەڕێبکە با بڕۆنە گوند و کێڵگەکانی دەوروبەر،
تاکو لەوێ بمێننەوە و خواردنیش پەیدا بکەن،
چونکە ئێمە لێرە لە شوێنێکی چۆڵداین.»
١٣ پێی فەرموون:
«ئێوە شتێکیان بدەنێ با بیخۆن.»
وەڵامیان دایەوە:
«لە پێنج نان و دوو ماسی زیاترمان نییە،
مەگەر بڕۆین نان بۆ هەموو خەڵکەکە بکڕین،»
١٤ چونکە نزیکەی پێنج هەزار پیاو دەبوون.
ئینجا بە قوتابییەکانی فەرموو:
«بە کۆمەڵ دایاننیشێنن،
هەر کۆمەڵێک نزیکەی پەنجا کەس بێت.»
١٥ جا بەم جۆرەیان کرد و هەموویان دانیشاندن.
١٦ ئینجا عیسا پێنج نانەکە و دوو ماسییەکەی هەڵگرت و تەماشای ئاسمانی کرد،
سوپاسی خودای کرد و لەتی کردن،
دایە قوتابییەکان تاکو لەبەردەمی خەڵکەکەی دابنێن.
١٧ هەموو خواردیان و تێر بوون.
لەو پەلکەنانەی لێیان مایەوە دوازدە سەبەتە هەڵگیرایەوە.
پەترۆس دان بەوەدا دەنێت کە عیسا مەسیحەکەیە
١٨ کاتێک عیسا بە تەنها نوێژی دەکرد،
قوتابییەکان لەگەڵی بوون،
لێی پرسین:
«خەڵکەکە دەڵێن من کێم؟»
١٩ وەڵامیان دایەوە:
«یەحیای لەئاوهەڵکێش،
هەندێکیش ئەلیاس،
خەڵکی دیکەش دەڵێن کە یەکێک لە پێغەمبەرانی کۆنە زیندووبووەتەوە.»
٢٠ پێی فەرموون:
«ئەی ئێوە دەڵێن من کێم؟»
پەترۆس وەڵامی دایەوە:
«مەسیحی* خودایت.»
٢١ ئەویش ئاگاداری کردنەوە و ڕایسپاردن ئەمە بە کەس نەڵێن.
یەکەم باسی مردنی عیسا
٢٢ هەروەها فەرمووی:
«کوڕی مرۆڤ دەبێت زۆر ئازار بچێژێت و پیران و کاهینانی باڵا و مامۆستایانی تەورات ڕەتی بکەنەوە،
بکوژرێت و لە ڕۆژی سێیەم هەستێنرێتەوە.»
٢٣ ئینجا بە هەمووانی فەرموو:
«ئەگەر کەسێک دەیەوێت ببێتە قوتابی من،
با نکۆڵی لە خۆی بکات و ڕۆژانە خاچەکەی هەڵبگرێت و دوام بکەوێت،
٢٤ چونکە ئەوەی بیەوێت ژیانی خۆی ڕزگار بکات دەیدۆڕێنێت،
بەڵام ئەوەی لە پێناوی من ژیانی خۆی بدۆڕێنێت،
ڕزگاری دەکات*.
٢٥ چی بەکەڵکی مرۆڤ دێت ئەگەر هەموو جیهان بباتەوە،
بەڵام خۆی بدۆڕێنێت یان خۆی لە دەست بدات؟
٢٦ ئەوەی شەرمی بە من و بە وتەکانم بێت،
کوڕی مرۆڤیش شەرمی پێی دەبێت،
کاتێک بە شکۆمەندی خۆی و باوک و فریشتە پیرۆزەکانەوە دێتەوە.
٢٧ «بەڵام ڕاستیتان پێ دەڵێم،
هەندێک لەوانەی لێرە ڕاوەستاون مردن ناچێژن هەتا شانشینی خودا نەبینن.»
شێوە گۆڕانی عیسا
٢٨ نزیکەی هەشت ڕۆژ لەدوای ئەم وتانە،
عیسا پەترۆس و یۆحەنا و یاقوبی برد و سەرکەوتە سەر چیایەک تاکو نوێژ بکات.
٢٩ کاتێک نوێژی دەکرد،
ڕوخساری گۆڕا و جلەکانی سپی بریسکەدار هەڵگەڕان.
٣٠ دوو پیاویش لەگەڵی دەدوان،
موسا و ئەلیاس بوون.
٣١ بە شکۆوە دەرکەوتن و لەبارەی ڕووداوی بەجێهێشتنی جیهان کە دەبووایە بەم نزیکانە لە ئۆرشەلیم بێتە دی،
گفتوگۆیان کرد.
٣٢ بەڵام پەترۆس و هاوڕێیانی خەو چاوی قورس کردبوون،
کاتێک بە تەواوی خەبەریان بووەوە شکۆی ئەویان بینی و هەروەها ئەو دوو پیاوەشیان بینی کە لەگەڵی ڕاوەستابوون.
٣٣ کاتێک پیاوەکان لە عیسا جیا دەبوونەوە،
پەترۆس بە عیسای گوت:
«گەورەم،
پێمان باشە لێرە بین.
با سێ کەپر دروستبکەین،
یەکێک بۆ تۆ و یەکێک بۆ موسا و یەکێکیش بۆ ئەلیاس.»
ئەمەی گوت بێ ئەوەی بزانێت باسی چی دەکات.
٣٤ کاتێک لەم قسانەدا بوو،
هەورێک هات و باڵی بەسەریاندا کێشا،
کە کەوتنە ناو هەورەکە،
ترسان.
٣٥ دەنگێک لەناو هەورەکەوە هات:
«ئەمە کوڕی منە،
ئەوەی هەڵمبژاردووە،
گوێی لێ بگرن.»
٣٦ کە دەنگەکە نەما،
عیسا بە تەنها بینرا.
ئەوانیش بێدەنگ بوون و لەو ڕۆژانەدا لەلای کەس باسی ئەو شتانەیان نەکرد کە بینییان.
دەرکردنی ڕۆحی پیس لە کوڕێکدا
٣٧ بۆ بەیانی،
کە لە کێوەکە هاتنە خوارەوە،
خەڵکێکی زۆر بەرەوپیریان هاتن.
٣٨ لەنێو خەڵکەکەدا پیاوێک هاواری کرد:
«مامۆستا،
لێت دەپاڕێمەوە تەماشای کوڕەکەم بکە،
چونکە تاقە کوڕمە.
٣٩ ڕۆحی پیس دەستی لێ دەوەشێنێت،
کوڕەکەشم لەناکاو هاوار دەکات و فێی لێ دێت و دەمی کەف دەکات،
بە زەحمەت وازی لێ دەهێنێت و شلوکوتی دەکات.
٤٠ لە قوتابییەکانت پاڕامەوە تاکو دەریبکەن،
بەڵام نەیانتوانی.»
٤١ عیسا وەڵامی دایەوە:
«ئەی نەوەی بێباوەڕ و خوار،
هەتا کەی لەگەڵتان بم و بەرگەتان بگرم؟
کوڕەکەت بهێنە ئێرە.»
٤٢ کاتێک کوڕەکە دەهات،
ڕۆحە پیسەکە ڕایتەکاند و فێی لێ هێنا،
عیساش لە ڕۆحە پیسەکەی ڕاخوڕی و کوڕەکەی چاککردەوە،
دایەوە دەست باوکی.
٤٣ هەموو لە گەورەیی خودا سەرسام بوون.
دووەم باسی مردنی عیسا
کاتێک هەمووان لە تەواوی کارەکانی عیسا سەرسام ببوون، عیسا بە قوتابییەکانی فەرموو:
٤٤ «بە باشی گوێ لە قسەکانم بگرن:
کوڕی مرۆڤ دەدرێتە دەست خەڵک.»
٤٥ بەڵام لەم قسەیە تێنەگەیشتن،
لێیان شاردرابووەوە تاکو حاڵی نەبن،
ترسان لەبارەی ئەم قسەیە پرسیاریشی لێ بکەن.
گەڕان بەدوای پلە و پایەدا
٤٦ دەمەقاڵەیەک لەنێوان قوتابییەکاندا دروست بوو لەسەر ئەوەی کە کامیان پایەبەرزترە.
٤٧ عیسا بە نیازی دڵیانی زانی،
منداڵێکی هێنا و لەلای خۆی ڕایگرت،
٤٨ پێی فەرموون:
«ئەوەی بە ناوی منەوە پێشوازی لەم منداڵە بکات،
پێشوازی لە من دەکات،
ئەوەش پێشوازی لە من بکات،
ئەوا پێشوازی لەوە دەکات کە ناردوومی،
چونکە بچووکترینی هەمووتان پایەبەرزترە.»
ئەوەی دژمان نییە لەگەڵمانە
٤٩ یۆحەنا گوتی:
«گەورەم،
یەکێکمان بینی بە ناوی تۆوە ڕۆحی پیسی دەردەکرد،
ڕێمان لێ گرت،
چونکە لەگەڵمان دوات ناکەوێت.»
٥٠ عیساش پێی فەرموون:
«ڕێی لێ مەگرن،
چونکە ئەوەی دژتان نییە لەگەڵتانە.»
پێداگری عیسا لەسەر ڕۆیشتنی بۆ ئۆرشەلیم
٥١ کە ڕۆژانی بەرزکردنەوەی* عیسا نزیک بووەوە،
پێداگری کرد لەسەر ڕۆیشتنی بۆ ئۆرشەلیم.
٥٢ نێردراوی لەپێش خۆی نارد،
ئەوانیش ڕۆیشتن و چوونە گوندێکی سامیرەییەکان تاکو شوێنی بۆ ئامادە بکەن،
٥٣ بەڵام پێشوازییان لێ نەکرد،
چونکە بەرەو ئۆرشەلیم دەچوو.
٥٤ کاتێک یاقوب و یۆحەنای قوتابییانی عیسا ئەمەیان بینی،
گوتیان:
«گەورەم،
دەتەوێ داوا بکەین لە ئاسمانەوە ئاگر بێتە خوارەوە و لەناویان ببات؟»
٥٥ بەڵام عیسا ئاوڕی دایەوە و سەرزەنشتی کردن.
٥٦ ئینجا چوونە گوندێکی دیکە.
نرخی شوێنکەوتنی عیسا
٥٧ کاتێک بە ڕێگادا دەڕۆیشتن،
یەکێک پێی گوت:
«بۆ هەرکوێ بچیت دوات دەکەوم.»
٥٨ عیساش پێی فەرموو:
«ڕێوی کونی هەیە و باڵندەی ئاسمانیش هێلانە،
بەڵام کوڕی مرۆڤ جێیەکی نییە کە سەری لەسەر دابنێت.»
٥٩ بە یەکێکی دیکەی فەرموو:
«دوام بکەوە.»
ئەمەیان گوتی:
«گەورەم،
ڕێگام بدە یەکەم جار بچم باوکم بنێژم.»
٦٠ عیساش پێی فەرموو:
«واز لە مردووان بهێنە با مردووەکانی خۆیان بنێژن،
بەڵام تۆ بڕۆ مزگێنی پاشایەتی خودا بدە.»
٦١ یەکێکی دیکە گوتی:
«گەورەم،
دوات دەکەوم،
بەڵام جارێ لێمگەڕێ با ماڵئاوایی لە خانەوادەکەم بکەم.»
٦٢ عیساش پێی فەرموو:
«هەرکەسێک دەست لەسەر گاسن دابنێت و ئاوڕ لە دواوە بداتەوە،
بەکەڵکی شانشینی خودا نایەت.»