یەکەم پەیامی بەلعام
١ بەلعام بە بالاقی گوت:
«لێرە حەوت قوربانگام بۆ دروستبکە و هەر لێرە حەوت گا و حەوت بەرانم بۆ ئامادە بکە.»
٢ بالاقیش بەم جۆرەی کرد،
وەک بەلعام گوتی.
ئیتر بالاق و بەلعام بۆ سەر هەر قوربانگایەک گایەک و بەرانێکیان سەرخست.
٣ ئینجا بەلعام بە بالاقی گوت:
«تۆ لەلای قوربانی سووتاندنەکەت بوەستە و من دەڕۆم،
لەوانەیە یەزدان بۆ بینینم بێت و هەرچی پیشانم بدات پێت دەڵێم.»
ئینجا بۆ شوێنێکی بەرز و چۆڵ چوو.
٤ خودا هاتە لای بەلعام،
بەلعامیش پێی گوت:
«حەوت قوربانگام ئامادە کرد و گایەک و بەرانێکم خستە سەر هەر قوربانگایەک.»
٥ یەزدان وشەی خستە دەمی بەلعام و فەرمووی:
«بۆ لای بالاق بگەڕێوە و ئاوا بڵێ.»
٦ ئەویش گەڕایەوە لای و بینی وا لەگەڵ هەموو پیاوە گەورەکانی مۆئاب لەلای قوربانی سووتاندنەکەی وەستاوە.
٧ ئیتر بەلعام پەیامەکەی ڕاگەیاند و گوتی:
«لە ئارامەوە بالاقی پاشای مۆئاب منی هێنا،
لە چیاکانی ڕۆژهەڵاتەوە،
گوتی ”وەرە نەفرەت لە یاقوب بکە بۆم،
وەرە جنێو بە ئیسرائیل بدە.“
٨ چۆن نەفرەت بکەم
کە خودا نەفرەتی لێیان نەکردبێت،
چۆن جنێو بدەم
کە یەزدان جنێوی پێیان نەدابێت؟
٩ لەسەر تاوێرەکانەوە دەیبینم،
لە گردەکانەوە تەماشای دەکەم،
گەلێک وا بە تەنها نیشتەجێ بووە،
خۆی بە یەکێک لە نەتەوەکان دانانێت.
١٠ کێ خۆڵی یاقوبی هەژمار کردووە،
کێ چارەکی ئیسرائیلی ژماردووە؟
با وەک مردنی سەرڕاستان بمرم و
کۆتاییم وەک ئەوان بێت!»
١١ بالاق بە بەلعامی گوت:
«چیت پێکردم!
بۆ نەفرەتکردن لە دوژمنانم تۆم هێنا،
کەچی وا داوای بەرەکەتیان بۆ دەکەیت!»
١٢ ئەویش وەڵامی دایەوە و گوتی:
«ئایا ئەوە نەڵێم،
ئەوەی کە یەزدان دەیخاتە سەر زارم تاکو بیڵێم؟»
دووەم پەیامی بەلعام
١٣ ئینجا بالاق پێی گوت:
«لەگەڵم وەرە بۆ شوێنێکی دیکە هەتا بیانبینیت،
بەڵام تەنها بەشێکی دەبینیت و هەمووی نابینیت،
لەوێوە نەفرەتیان لێ بکە.»
١٤ جا بردیە کێڵگەی چۆفیم بۆ سەری پسگە و حەوت قوربانگای بنیاد نا و هەر قوربانگایەک گایەک و بەرانێکی سەرخستە سەری.
١٥ بەلعام بە بالاقی گوت:
«لێرە لەلای قوربانی سووتاندنەکەت بوەستە و من دەچمە ئەوێ بۆ گەیشتن بە یەزدان.»
١٦ یەزدان بە بەلعام گەیشت و وشەی خستە دەمی و فەرمووی:
«بگەڕێوە لای بالاق و ئاوا بڵێ.»
١٧ ئەویش هاتە لای و بینی وا لەگەڵ پیاوە گەورەکانی مۆئاب لەلای قوربانی سووتاندنەکەی وەستاوە.
بالاق لێی پرسی:
«یەزدان چی فەرموو؟»
١٨ ئیتر پەیامەکەی ڕاگەیاند و گوتی:
«ئەی بالاق،
هەستە و گوێ بگرە،
ئەی کوڕی چیپور،
گوێم بۆ شل بکە،
١٩ خودا مرۆڤ نییە کە درۆ بکات،
کوڕی مرۆڤیش نییە کە بڕیاری بگۆڕێت.
ئایا قسە دەکات و ئەنجامی نەدات؟
یان بەڵێن دەدات و نایباتە سەر؟
٢٠ فەرمانم پێدراوە داوای بەرەکەت بکەم،
ئەو بەرەکەتداری کردووە و من ناتوانم بیگۆڕم.
٢١ «لە یاقوبدا بەدبەختی بەرچاو نەکەوتووە،
لە ئیسرائیلدا مەراقی نەبینیوە،
یەزدانی پەروەردگاریان لەگەڵیاندایە،
هوتافی پاشا لەنێویاندایە.
٢٢ خودا لە میسر دەریهێنان،
ئەوانە هێزی گای کێوییان هەیە.
٢٣ جادووگەری لە دژی یاقوب بە کەڵک نایەت،
فاڵگرتنەوەش لە دژی ئیسرائیل بێ سوودە.
ئێستا دەربارەی یاقوب و ئیسرائیل دەگوترێت،
”سەیر بکە خودا چی کردووە!“
٢٤ گەلێک وەک شێرە مێ هەڵدەستێت،
وەک نەڕەشێر بەرز دەبێتەوە،
ناخەوێت هەتا نێچیرێک نەخوات و
خوێنی کوژراوان نەخواتەوە.»
٢٥ ئینجا بالاق بە بەلعامی گوت:
«نە نەفرەتی لێ بکە و نە داوای بەرەکەتی بۆ بکە.»
٢٦ بەلعامیش وەڵامی دایەوە:
«پێم نەگوتیت ئەوەی یەزدان بیڵێت،
ئەوە دەکەم؟»
سێیەم پەیامی بەلعام
٢٧ بالاقیش بە بەلعامی گوت:
«وەرە بتبەمە شوێنێکی دیکە،
بەڵکو لەبەرچاوی خودا باش بێت و لەوێوە بۆ من نەفرەتیان لێ بکە.»
٢٨ ئینجا بالاق بەلعامی بردە سەر لووتکەی پەعۆر کە دەڕوانێتە سەر چۆڵەوانی.