سەرکەوتنی جولەکەکان
١ لە سێزدەی دوازدە،
واتە لە مانگی ئادار،
کاتی جێبەجێکردنی قسە و فەرمانەکەی پاشا هات.
لەو ڕۆژەدا کە دوژمنەکانی جولەکەکان چاوەڕوان بوون تێیدا بەسەریاندا زاڵ بن،
بەڵام دۆخەکە لە دژیان هەڵگەڕایەوە بە شێوەیەک کە جولەکەکان بەسەر ناحەزەکانیاندا زاڵ بوون.
٢ جولەکەکان لە هەموو هەرێمەکانی ئەحەشوێرۆشی پاشا لەناو شارەکانیان کۆبوونەوە،
بۆ ئەوەی هێرش بکەنە سەر ئەوانەی دەیانویست خراپەیان بەرامبەر بکەن.
بەڵام کەس لەبەردەمیان خۆی ڕانەگرت،
چونکە خەڵک زۆر لێیان ترسان.
٣ هەموو سەرکردەکانی هەرێمەکان،
میر و پارێزگار و لێپرسراوەکانی پاشاش یارمەتی جولەکەکانیان دەدا،
چونکە ترسی مۆردەخای لەسەریان نیشتبوو.
٤ مۆردەخای لە کۆشکی پاشا پلەیەکی گەورەی هەبوو،
ناوبانگی لەناو هەموو هەرێمەکان بڵاوببووەوە،
بەردەوام بەهێز دەبوو.
٥ جولەکەکان بە شمشێر لە هەموو دوژمنەکانیان دا،
کوشتیانن و لەناویانبردن،
ئەوەی ویستیان بە ناحەزەکانیان کرد.
٦ جولەکەکان لە قەڵای شوش پێنج سەد پیاویان کوشت و لەناویانبردن.
٧ هەروەها ئەوانەشیان کوشت:
پەرشەنداتا،
دەلفۆن،
ئەسپاتا،
٨ پۆراتا،
ئەدەلیا،
ئەریداتا،
٩ پەرمەشتا،
ئەریسەی،
ئەریدەی و ڤەیزاتا،
١٠ کە دە کوڕەکەی هامانی کوڕی هەمەداسای دوژمنی جولەکەکان بوون،
بەڵام دەستیان بۆ تاڵانی درێژ نەکرد.
١١ لەو ڕۆژەدا ژمارەی کوژراوەکان لە قەڵای شوش هێنرایە بەردەستی پاشا.
١٢ جا پاشا بە شاژنە ئەستێری گوت:
«جولەکەکان لە قەڵای شوش پێنج سەد پیاویان لەگەڵ دە کوڕەکەی هامان کوشتووە و لەناویانبردوون.
ئایا دەبێت لە هەرێمەکانی دیکەی پاشادا چییان کردبێت؟
ئێستاش بابەتەکەت چییە؟
پێت دەدرێت.
چ داواکارییەکی دیکەت هەیە؟
بۆت جێبەجێ دەکرێت.»
١٣ ئەستێریش گوتی:
«ئەگەر پاشا ڕازی بێت،
با سبەینێش لە قەڵای شوش کارەکەی ئەمڕۆیان بکەنەوە،
هەروەها با تەرمی هەر دە کوڕەکەی هامان لە دار بدرێن.»
١٤ ئینجا پاشا فەرمانی دا ئەوە بکەن.
لە شوش فەرمان دەرکرا و تەرمی هەر دە کوڕەکەی هامان لە دار دران.
١٥ پاشان جولەکەکانی ناو شوش لە چواردەی ئادار دووبارە کۆبوونەوە،
سێ سەد پیاویان لە شوش کوشت،
بەڵام دەستیان بۆ تاڵانی درێژ نەکرد.
١٦ هەروەها جولەکەکانی دیکەش کە لە هەرێمەکانی پاشادا بوون،
کۆبوونەوە بۆ بەرگریکردن لە خۆیان و ڕزگاربوونیان لە دوژمنەکانیان.
حەفتا و پێنج هەزار کەسیان لە ناحەزەکانیان کوشت،
بەڵام دەستیان بۆ تاڵانی درێژ نەکرد.
١٧ ئەمە لە سێزدەی ئادار ڕوویدا،
لە چواردەی مانگ پشوویان دا و کردیانە ئاهەنگگێڕان و خۆشی.
١٨ بەڵام جولەکەکانی ناو شوش لە سێزدە و چواردەی مانگ کۆبوونەوە و لە پازدەی مانگ پشوویان دا و کردیانە ڕۆژی ئاهەنگ و خۆشی.
١٩ لەبەر ئەوە ئەو جولەکانەی لە دەشت و گوندە بچووکەکان دەژیان چواردەی مانگی ئاداریان کردە شادی و ئاهەنگگێڕان و خواردنیان بە دیاری بۆ یەکتر دەنارد.
جەژنی پوریم
٢٠ ئینجا مۆردەخای ئەم ڕووداوانەی تۆمار کرد و چەندین نامەی نارد بۆ هەموو جولەکەکانی ناو هەموو هەرێمەکانی ئەحەشوێرۆشی پاشا،
بە دوور و نزیکەوە،
٢١ بۆ ئەوەی فەرزی بکات لەسەریان کە هەموو ساڵێک لە چواردە و پازدەی مانگی ئادار ئاهەنگ بگێڕن،
٢٢ چونکە ئەوە ئەو کاتەیە جولەکەکان لە دوژمنەکانیان ڕزگار بوون،
ئەو مانگەیە کە شیوەنیان بووە خۆشی و هاواریان بووە پێکەنین.
مۆردەخای داوای لێکردن ئەوە ببێتە جەژنێک و خوان بڕازێننەوە و دڵخۆش بن و دیاری پێشکەش بە یەکتری بکەن،
هەروەها دیاری پێشکەش بە هەژاران بکەن.
٢٣ ئیتر جولەکەکان داواکارییەکەی مۆردەخایان پەسەند کرد،
بەردەوام بوون لەو ئاهەنگگێڕانەی دەستیان پێی کردبوو.
٢٤ هامانی کوڕی هەمەداسای ئەگاگی دوژمنی هەموو جولەکەکان پیلانی گێڕا بۆ ئەوەی جولەکەکان لەناو ببات،
پوری‏ فڕێدا،
واتە تیروپشکی کرد،
بۆ ئەوەی قڕیان بکات و لەناویان ببات.
٢٥ بەڵام کاتێک ئەستێر چووە ژوورەوە بۆ بەردەم پاشا،
پاشا بە نووسراوێک فەرمانی دا،
ئەو پیلانە خراپەی کە هامان لە دژی جولەکەکان دایڕشتبوو هەڵبگەڕێتەوە بۆ سەر خۆی،
خۆی و کوڕەکانی لە دار دران.
٢٦ لەبەر ئەوە ئەو ڕۆژانە ناونران پوریم لەسەر ناوی پور‏.
لەبەر هەموو وشەکانی ئەم نامەیە و ئەوەی بینییان و بەسەریان هات،
٢٧ جولەکەکان پەسەندیان کرد و کردیانە نەریت،
خۆیان و نەوەکانیان و ئەوانەشی دەچنە پاڵیان پەیڕەویان کرد،
بۆ ئەوەی لە یاد نەکرێن،
هەمیشە لەو دوو ڕۆژەدا بەپێی ئەوەی کە نووسراوە و لە کاتی خۆیاندا هەموو ساڵێک ئاهەنگ بگێڕن.
٢٨ هەروەها ئەم ڕۆژانە یادیان بکرێتەوە،
لەنێو هەموو نەوە و هۆز و هەرێمێک و لە هەموو شارێک ئاهەنگیان بۆ ساز بکرێت.
ڕۆژانی پوریم هەرگیز لەنێو جولەکەکان لەبیر نەکرێن و ناشبێت لەلایەن نەوەکانیانەوە لە یاد بکرێت.
٢٩ ئینجا شاژنە ئەستێری کچی ئەبیحەیل لەگەڵ مۆردەخای جولەکە بە هەموو دەسەڵاتێکەوە نامەیەکی دیکەیان نووسی بۆ پشتڕاستکردنەوەی ئەم نامەیەی دووەم کە سەبارەت بە پوریم بوو.
٣٠ مۆردەخای نامەکانی بۆ هەموو جولەکەکانی ناو سەد و بیست و حەوت هەرێمەکەی شانشینی ئەحەشوێرۆش نارد،
وێڕای هیوای شادی ئارامییان بۆ جولەکەکان،
٣١ بۆ چەسپاندنی دوو ڕۆژەکەی پوریم لە کاتی دیاریکراوی خۆی.
هەروەک مۆردەخای جولەکە و شاژنە ئەستێر داوایان لێیان کرد،
ئەوانیش بۆ خۆیان و نەوەکانیان پەسەندیان کرد کە بەڕۆژوو بن و شین بگێڕن.
٣٢ فەرمانەکەی ئەستێر ڕێنماییەکانی پوریمی دووپات کردەوە و لە پەڕتووکێکدا تۆمار کرا.