باری یەکتری هەڵبگرن
١ خوشکان،
برایان،
ئەگەر کەسێک تووشی گوناهێک بوو،
با ئێوەی ڕۆحانی کەسی ئاوا بە ڕۆح نەرمی ڕاست بکەنەوە.
سەیری خۆشت بکە،
نەوەک تۆش تاقی بکرێیتەوە.
٢ باری یەکتری هەڵبگرن و بەم شێوەیە شەریعەتی مەسیح بهێننە دی.
٣ ئەگەر یەکێک خۆی بە شتێک زانی،
بەڵام لەڕاستیدا هیچ نەبوو،
ئەوا خۆی هەڵدەخەڵەتێنێت.
٤ بەڵام با هەریەکە کرداری خۆی تاقی بکاتەوە،
ئەوسا با تەنها شانازی بە خۆیەوە بکات،
نەک بە کەسێکی دیکەوە،
٥ چونکە هەرکەسێک باری خۆی هەڵدەگرێت.
٦ ئەو کەسەی فێری وشەی خودا* دەکرێت،
دەبێت فێرکارەکەی لە هەموو شتێکی باشدا بەشدار بکات.
٧ خۆتان هەڵمەخەڵەتێنن،
خودا گاڵتەی پێ ناکرێت.
مرۆڤ چی بچێنێت،
ئەوە دەدروێتەوە.
٨ ئەوەی بۆ سروشتی دنیایی خۆی بچێنێت،
گەندەڵی لە سروشتی دنیایی دەدروێتەوە،
بەڵام ئەوەی بۆ ڕۆحی پیرۆز بچێنێت لە ڕۆحەکەوە ژیانی هەتاهەتایی دەدروێتەوە.
٩ کەواتە با لە چاکەکاری نەکەوین،
چونکە ئەگەر ورە بەرنەدەین لە کاتی خۆیدا دروێنەی دەکەین.
١٠ ئینجا هەتا دەرفەتمان هەیە،
با چاکە لەگەڵ هەمووان بکەین،
بە تایبەتی لەگەڵ خێزانی باوەڕداران.
 
بەدیهێنراوی نوێ
١١ سەیر بکەن،
ئەو پیتانە کە بە دەستی خۆم نووسیومە چەندە گەورەن.*
 
١٢ ئەوانەی دەیانەوێت لە جەستەدا ڕواڵەتێکی چاک دروستبکەن،
ئەوانە ناچارتان دەکەن خەتەنە بکرێن،
تەنها تاکو لەبەر خاچی مەسیح نەچەوسێنرێنەوە.
١٣ ئەوانەی خەتەنەکراون،
شەریعەتی تەورات پەیڕەو ناکەن،
تەنها دەیانەوێت ئێوە خەتەنە بکرێن،
تاکو شانازی بە جەستەی ئێوەوە بکەن.
١٤ لە من بەدوور بێت شانازی بە هیچ شتێکەوە بکەم،
جگە لە خاچی عیسای مەسیحی خاوەن شکۆمان،
کە بەهۆیەوە جیهان بۆ من لە خاچ دراوە،
منیش بۆ جیهان،
١٥ چونکە نە خەتەنەکردن سوودی هەیە و نە خەتەنەنەکردنیش،
بەڵکو بەدیهێنراوی نوێ.
١٦ با ئاشتی و بەزەیی بۆ هەموو ئەوانە بێت کە ئەم یاسایە پەیڕەو دەکەن،
بۆ گەلی ئیسرائیلی خوداش.
 
١٧ ئیتر با کەس گرفتم بۆ دروستنەکات،
چونکە نیشانەکانی عیسام لە لەشدا هەڵگرتووە.
 
١٨ خوشکان و برایان،
با نیعمەتی عیسای مەسیحی خاوەن شکۆمان لەگەڵ ڕۆحتان بێت.
ئامین.